Hordhac
Mustaqbalka qof walba ma aha wax ku yimaada si lama filaan ah, balse waa natiijada go’aamada iyo tallaabooyinka uu qaado maanta. In badan oo dhalinyaro Soomaaliyeed ah ayaa weli ku nool fikir ah in mustaqbalkooda gacanta dadka kale ku jiro, ha noqoto dowlad, qoys, ama qaraabo dibadda jooga. Aragtidan waxay dhalisaa niyad-jab iyo sugitaan dheer oo aan natiijo keeni karin.
Haddaba, marka aan isweydiinno su’aasha ah: “Mustaqbalkaaga ma ku aaminsan tahay gacantaada mise gacanta dadka kale?” waa inaan si dhab ah uga jawaabnaa, si aan u ogaanno cidda masuulka ka ah nolosheena. Mustaqbalku waa sida beer lagu beero: haddii aad maanta abuurto, berri ayaad goosan doontaa; haddii aad sugto qof kale inuu kuu beero, waxa dhici karta inaadan weligaa wax goosan. Sidaas darteed, fahamka in mustaqbalka uu asal ahaan ka soo bilowdo gudaha qofka waa tallaabada ugu horreysa ee guusha.
1: Mustaqbalka gacanta qofka doorka shaqsiga iyo awoodda go’aan qaadashada
Marka qof dhalinyaro ah uu go’aansado in mustaqbalkiisu ku jiro gacantiisa, wuxuu helaa xorriyad weyn iyo awood uu noloshiisa ku beddelo. Mustaqbalka gacanta qofka wuxuu ka dhigan yahay inuu shaqsigu qaato masuuliyadda go’aamadiisa: waxbarashadiisa, xirfaddiisa, iyo waqtigiisa sida uu u maareeyo. Tusaale ahaan, dhalinyaro go’aansata in ay waqtiga geliso aqoonta iyo xirfadaha casriga ah waxay mustaqbalka u diyaarsan doonaan fursado badan oo shaqo iyo ganacsi ah, halka kuwa waqtigooda ku lumiyo madadaalo aan faa’iido lahayn ay mustaqbal adag la kulmi doonaan.
Sida uu qof walba u qaato go’aamo yaryar maalin kasta sida in uu buug akhriyo halkii uu saacado ku lumi lahaa TikTok ama inuu xirfad baranayo halkii uu ciyaaro waqtiga ayaa si toos ah u dhisaysa jidkiisa mustaqbalka. Qofka garowsada in awoodda isbeddelka uu ku jiro naftiisa ayaa ka adkaan kara duruuf kasta, xitaa haddii aanu lahayn hanti ama taageero dibadeed.
2: Mustaqbalka gacanta dadka kale bulshada, qoyska, iyo dowladdu sidee ugu lug leeyihiin
Dabcan, ma dafiri karno in bulshada iyo dadka nagu hareeraysan ay qayb weyn ku leeyihiin qaabeynta mustaqbalka qofka. Qoyska ayaa door ka ciyaara korriimada asaasiga ah, halka dowladdu ay masuul ka tahay abuurista fursado waxbarasho, shaqo iyo amni. Sidoo kale, bulshada ballaaran ayaa saamayn ku leh fikradaha iyo dhaqamada dhalinyarada. Laakiin khalad weyn ayaa dhacaya marka dhalinyaro badan ay si buuxda ugu aaminaan mustaqbalkooda gacanta dadka kale, iyagoo aaminsan in dowladdu, qoyska, ama qaraabada dibadda jooga ay si toos ah u keeni doonaan guusha.
Taas beddelkeeda, waa in la fahmaa in dadka kale ay yihiin kaaliye ama hagayaal, balse aysan noqon karin kuwa masuul ka ah nolosha qof kale. Haddii dhalinyaro kasta sugto dowlad si ay u siiso shaqo, waxay noqonaysaa sugitaan dheer oo aan dhammaanayn. Laakiin haddii uu qofku fahmo in dowladda iyo bulshada keliya ay abuuraan jawi uu ku shaqeysto, halka shaqada dhabta ahi ay isaga ku taallo, markaas ayuu helayaa xorriyad iyo madax-bannaani mustaqbaleed.
3: Khataraha sugitaanka dadka kale iyo luminta fursadaha
Mid ka mid ah dhibaatooyinka ugu weyn ee dhalinyarada maanta heysta waa in ay mustaqbalkooda ku aamineen gacanta dadka kale. Tani waxay dhalisaa xaalad la yiraahdo "victim mentality" ama dareen qofka ku qasba inuu aamino inuusan waxba qaban karin ilaa qof kale u sameeyo. Tusaale ahaan, dhalinyaro badan ayaa yiraahda: “Dowlad baan sugayaa si ay shaqo ii siiso,” ama “Qaraabada dibadda ayaan sugayaa inay iiga soo diraan lacag.”
Sugitaankaas ayaa sababa in waqtigooda dahabiga ah uu si fudud uga dhumo, iyagoo luminaya sannado muhiim ah oo ay wax ku qaban lahaayeen. Inta ay sugayaan, fursado badan ayaa dhaafa, waxaana ka muuqda daal, niyad-jab iyo rajo beel. Mustaqbalka qofka waxaa burburiya sugitaan joogto ah, sababtoo ah fursadaha adduunku cidna uma joogsadaan. Qof kasta oo waqtiga qaaliga ah ku khasaaro sugaan dadka kale, wuxuu halis ugu jiraa in uu mar uun ogaado in da’diisu ka gudubtay, balse uusan wax guul ah ku qorin. Waa sida qof beer sugaya, isagoo aan weligiis abuurin goosashadaas ma iman doonto.
4: Xalka sida dhalinyaro kastaa u qaadan karo masuuliyadda mustaqbalkeeda
Xalka ugu weyn ee dhalinyarada Soomaaliyeed waa in ay qaataan masuuliyadda buuxda ee mustaqbalkooda. Tani macnaheedu ma aha in ay iska go’aan bulshada ama dowladda, balse waa in ay fahmaan in masiirkooda ugu weyn ku jiro naftooda. Waxaa lagama maarmaan ah in ay horumariyaan aqoontooda, xirfado cusub bartaan, waqtigooda si wanaagsan u maareeyaan, iyo in ay naftooda ku qasbaan in ay noqdaan hal-abuurayaal.
Inta badan guulaha dunida maanta lagu arkayo waxaa gaadhay dad aan lahayn taageero bulsho oo weyn, balse ku tiirsanaa maskaxdooda iyo dadaalkooda. Dhalinyarada Soomaaliyeed haddii ay qaataan go’aankaas, waxay noqon karaan jiil wax beddela, halkii ay noqon lahaayeen jiil sugaya. Mustaqbalkaaga wuxuu bilaabmaa marka aad maanta isweydiiso: “Maxaan anigu qaban karaa?” halkii aad ka oran lahayd: “Maxay dadka kale ii qaban karaan?”
5: Waqtiga waa hantida ugu qaalisan ee dhalinyarada
Waqtigu waa hantida kaliya ee qof walba loo siiyay si siman, balse si kala duwan loo maareeyo. Qofka dhalinyarada ah ee garwaaqsada qiimaha waqtiga wuxuu helayaa fursad uu mustaqbal dhisan ku abuurto. In badan oo dhalinyaro ah ayaa maalin walba ku lumiya saacado badan madadaalo, kulamo aan micno lahayn, ama baraha bulshada iyagoo aan qorshe lahayn.
Marka waqtigaas lagu beddelo waxbarasho, xirfad barasho, ama hal-abuurnimo, mustaqbalka qofka ayaa si toos ah u kobcaya. Waa in aan fahannaa in waqtiga aanu dib u soo noqon doonin; halkii uu dhaafo maalin kastaa waa bog cusub oo kitaabka nolosha laga xiro. Sidaas awgeed, dhalinyaro kasta oo waqtigiisa ilaalisa waxay dhisaneysaa geed mustaqbal oo mirihiisa la goosan doono sanadaha soo socda.
6: Waqti lumiska iyo burburinta mustaqbalka
Marka qofka dhalinyaro ah uu waqtigiisa ku lumiyo sugitaanka dadka kale, wuxuu si aan toos ahayn u burburinayaa mustaqbalkiisa. Tusaale ahaan, dhalinyaro badan ayaa saacado ku khasaarisa sugitaanka shaqo dowladeed ama taageero qaraabo, iyagoo aan naftooda waxna ku darin. Waqti kasta oo lumay wuxuu u dhigmaa albaab fursad oo mar dambe aan dib loo furin.
Mustaqbalka ma burburo hal mar, balse wuxuu si tartiib ah ugu dumaa maalin kasta oo qofku iska dayaco waqtigiisa. Waxaa jirta xikmad oranaysa: "Qofka waqtigiisa khasaaray, noloshiisa ayuu khasaaray." Haddii aan rabno mustaqbal dhisan, waa inaan fahannaa in waqtiga lumay uu yahay khasaaraha ugu weyn ee aan ka soo kaban karno.
7: Faa’iidada qorsheynta waqtiga
Qofka qorsheeya waqtigiisa wuxuu leeyahay hagitaan iyo yool cad oo uu ku socdo. Maalin aan qorshe lahayn waa sida markab badda ku daawanaya oo aan marin lahayn. Qorsheynta waqtigu waxay dhalinyarada siinaysaa awood ay ku kala hormariyaan waxyaabaha muhiimka ah, isla markaana uga fogaadaan waxyaabaha aan qiimaha lahayn.
Tusaale ahaan, haddii dhalinyaro qorsheeyaan maalintooda iyagoo waqti u qoondeeya waxbarashada, xirfad barashada, caafimaadka, iyo nasashada, waxay mustaqbal ahaan noqonayaan dad isku dhisan oo noloshooda si nidaamsan u maareeya. Qorsheynta waqtiga ma aha kaliya jadwal qoris, waa falsafad nololeed qofka baraysa inuu yoolkiisa gaadho isaga oo si wanaagsan u isticmaalaya hantida uu haysto.
8: Dhalinyarada Soomaaliyeed iyo baahida waqtiga qiimeyntiisa
Dhalinyarada Soomaaliyeed waxay ku nool yihiin duruufo adag oo ay ku jiraan shaqo la’aan, fursado kooban, iyo jawi bulsho oo caqabad leh. Si kastaba ha ahaatee, waxaa jira hal shay ay si siman ula wadaagaan dhalinyarada dunida kale: waqtiga. Cidna kama qaadi karto 24-ka saac ee maalin kasta. Haddii dhalinyarada Soomaaliyeed ay bartaan qiimeynta waqtiga, waxay awood u yeelan karaan inay abuuraan mustaqbal ka duwan kan ay ku jiraan maanta.
Taasi waxay ku imaanaysaa in la yareeyo waqtiga lagu lumiyo wax aan faa’iido lahayn, lana kordhiyo waqtiga lagu maalgeliyo waxbarashada, hal-abuurnimada iyo ganacsiga. Mustaqbalka qaran oo dhan wuxuu ku tiirsan yahay sida dhalinyarada maanta u maareeyaan waqtigooda, sababtoo ah waqtiga lumay qaran ahaan waa horumar lumay.
Gunaanad
Ugu dambayn, mustaqbalka qof walba waa sida kitaab aan weli la qorin oo uu isagu gacantiisa ku qorayo. Qof kasta oo ka war sugaayo dadka kale inuu u sameeyo guul wuxuu halis ugu jiraa in uu waayo fursado dahabi ah oo aan mar kale soo noqon doonin. Mustaqbalkaagu wuxuu ku jiraa tallaabooyinka aad maanta qaado, go’aamada aad ku dhiirrato, iyo sida aad waqtigaaga u ilaaliso.
Sugitaanka dadka kale waa jid dheer oo ku dhamaada niyad-jab, halka qaadashada masuuliyadda naftaadu ay tahay jidka keliya ee kugu hogaaminaya guul iyo madax-bannaani. Haddaba dhalinyarooy, waxaad haysataa laba ikhtiyaar: inaad sugto dadka kale ama inaad maanta bilowdo qorista buuggaaga mustaqbalka. Go’aanku gacantaada ayuu ku jiraa.
0 Comments