Qore:Mustafe Abdifatah Abdilaahi
Noloshu waa sida wado dheer oo mararka qaar toosan tahay, mararka qaarna laamiyeysan oo qarqaryo leh. Dad badan waxay ku dhacaan halkii ay istaagi lahaayeen, waxayna ku tiirsan yihiin cabsi iyo quus halkii ay ku noolaan lahaayeen rajo iyo halgan. Waxa aan maanta rabaa inaan qof kasta xusuusiyo: imtixaanka noloshu waa mid aan joogsi lahayn, laakiin kartida aad leedahay waa mid aan xad lahayn.
Waxaa jira waqtiyo aad dareemayso in dhammaan albaabadu kaa xiran yihiin, in caalamku ku illowsan yahay, iyo in riyadaadii ay ku urureen gees madow. Laakiin dhab ahaantii, waxa kaliya ee kaa dhexeeya adiga iyo guushaadu waa adiga laftaada. Waxaad tahay qofka kaliya ee samayn kara go’aanka inuu kaco oo uu mar kale isku dayo.
Waxaad arki doontaa dad badan oo kugu yiraahda “Maya”. Waxaad maqli doontaa “Ma awoodid”, “Ma gaadhi kartid”, “Ma u qalantid”. Laakiin marna ha u ogolaan codka dadka kale inuu ka xoog bato codkaaga gudaha kuugu jira. Sababtoo ah waxa runta ah waa inaysan jirin cid ka og waxa qalbigaaga ku jira. Waxaad leedahay riyo, qorshe iyo awood aadan weli ogaanin ilaa aad isku daydo.
Waxaad maanta joogtaa halkan adigoo nool, micnaheedu waa in Alle kuu ogolaaday fursad kale oo aad noloshaada wax uga beddesho. Dad badan waxay seexdeen shalay iyagoo rajo qaba, laakiin maanta ma noola. Adiguna maanta fursad baad haysataa. Su’aasha kaliya ayaa ah: Maxaad ku samaynaysaa fursaddaas?
Haddii aad ku dul dhacayso, kac. Haddii aad seegto, isku day mar kale. Haddii dadka kuu jeestaan, Alle weli wuu kula jiraa. Haddii qof ku yiraahdo “Adigu ma tihid qof wax gaadha”, ku tus ficilkaaga. Noloshu waa imtixaan, mana jirto warqad jawaabo oo kuu diyaarsan — adigu ayaad qortaa. Adigaa qoraaga ah. Adigaa jilaa ah. Adigaa go’aanka leh.
Xusuusnow, inta aad cabsi ka qabto guuldarro, guusha ma gaadhi kartid. Haddii aad guuldarro ka baqdo, weligaa halkaan baad taagnaan doontaa. Laakiin haddii aad guuldarro u timaaddo sidii cashar, waxay ku noqonaysaa dariiq aad ku barato sida loo guulaysto. Dadka ugu guulaha badan adduunka waa kuwii ku guuldaraystay marar badan — kaliya way diideen inay quustaan.
Wax kasta oo aad maanta ku riyoonayso, ha u ogolaanin maskaxdaada ama dadka kale inay kuu sheegaan inay adag tahay. Dhibku waa qayb ka mid ah quruxda nolosha. Dhibku waa macallinka kugu bara inaad adkaato, samir yeelato, iyo in maskaxdaadu fikir cusub dhaliso. Mararka qaar guusha ugu weyn waxay ku jirtaa in aanad quusanin.
Waxaan maanta kugu boorinayaa: samee tallaabadaas yar. Qor qorshahaas yar. Kula hadal naftaada sida saaxiib fiican. Ka ilaali maskaxdaada fikirka taban. La xidhiidh dad ku dhiirrigeliya oo kaa caawin kara inaad aragto iftiinka marka mugdigu kugu batto.
Maanta waa imtixaan, berrina waa imtixaan kale. Laakiin haddii aad maanta adkaysato, berrito way fududaan doontaa. Tallaabo yar maalin kasta, go’aan yar maalin kasta — sidaas ayay riyadu ku rumowdaa. Waxba yaanay kugu dheeraynin, kaliya bilow.
Haddii uu qalbigaagu kugu yidhaahdo “Iska daa”, adigu ku dheh “Waxaan halkaa ka bilaabayaa!”.
0 Comments